شهوة

نشتهي نقوم الصباح، نحل عينيا، نلقاك محملني

شاددلي اديا... نسري عليك نبوسك، نشم ريحتك ونملا بها رواريا وجواجيا..

 نشتهي نستقبل يوم جديد و نفرح معاك و بيك قدام شمس الصيف إلي من صرة السما طالعة تتبختر ، تتزعبن، تدلل ، و تبعثلنا في سخانتها ، وتقللنا : "قوموا، قوموا، راني من فرشكم غايرة، ومن بعدكم عالناس حايرة ... يا أولادي قوموا، قوموا، و انفضوا شوية عشق عالناس الباردة "

نشتهي نصبح عليك ونملا نهاري ببسماتك و ضحكاتك... نشتهي نقلك : "عيدك مبروك عزيزي" ... نجيبلك قهوتك في طبق أخضر  ونهديلك وردة حمرا و نشد نبوسك ونبوسك ونبوسك لين تقلي مابين ضحكتين "يا دحنوسة راك غفصتني" 

نشتهي تعطيني مهبتي وتقلي : "عيدك مبروك يا عينيا وخليك على طول  ليا " ... نفرح، نقز، نضحك، نبكي، نحملك، نقرس روحي و نقرسك معايا ونقلك : "احنا في حلم وإلا في علم ؟" .. متجاوبنيش، أما ثنية الفرش إلي جابتننا  ترجعنا....